南韓大晒 澳洲獻細

猪拉多纳

力爭首名 今非昔比

世界盃亞洲區A組賽事，出線熱門南韓主場迎戰卡塔爾，「太極虎」捱過艱難賽程，最後四輪三次主場出擊，佢哋唔敢睇小西亞富豪國卡塔爾，今次精銳盡出目標明確，有望大勝一場，推介大盤！（now 671及672周二晚7時直播）

A組暫時係亂局，烏茲別克五戰八分帶頭，二至四位南韓，伊朗及卡塔爾同得七分，「二哥」南韓踢少場，而且已經作客對完其餘三個競爭對手，剩番一場作客賽事係鬥包尾球隊黎巴嫩，形勢大好。「太極虎」實力強橫，根本唔使計咁多數，只要餘下三次主場出擊贏晒就掂。
外流球員孭重飛

南韓今次以幾個外流球員擔大旗，前線由漢堡射手孫弘民攻堅，史雲斯中場寄誠庸同奧格斯堡中場具滋哲組成雙塔校炮，加埋「獅子王」李東國及李根鎬等優質攻擊球員，可以大踢進攻足球狂攻對手。佢哋上次作客卡塔爾大勝四比一，今次返主場更惡，可再追多鋪大盤。

世界盃亞洲區B組賽事，澳洲主場撲擊阿曼，「袋鼠國」黃金一代光輝不再，今次呢場關鍵六分波並無必勝把握，主Ｗ熱至1.21倍揀唔落手。澳洲攻力疲弱，分組賽平均每戰入一粒，今場玩細盤最好！

（now 671及672周二下午4時30分直播）

澳洲盛世已過，尼爾、艾馬頓同基維爾等名將已經老退，現時靠晒兩老卡希爾同比斯安奴策動進攻，兩人都唔喺歐洲頂級聯賽搵食，卡希爾轉戰美職後明顯跌Watt，大軍中場創造力嚴重不足。本來佢哋仲有瓣高空轟炸，但長人中鋒約舒亞堅尼地傷患纏身未有入選，箭頭保斯基及羅比古斯都非大將，只能靠三十四歲老將艾奇湯臣衝鋒陷陣，實在可悲！澳洲分組賽四戰僅入四球，上次作客阿曼互交白卷，今戰欠大勝本錢。
約旦受讓唔怕日本

B組一哥日本作客對住包尾大幡約旦，日軍首循環主場淨勝對手六球，但佢哋今次缺少進攻重心本田圭佑，而且喺榜首甩開8分贏唔贏都冇乜所謂，決心肯定唔及對手，讓波靠唔住。約旦主場都幾硬淨，可博「讓球主勝」。