FC悉尼搶分爭季後賽資格

猪拉多纳

今日澳職爆發「悉尼打吡戰」，由西悉尼流浪者鬥FC悉尼，後者仍要為季後賽資格搏命，鬥志絕對唔會差得過想提早攞常規賽冠軍嘅主隊，FC悉尼受讓半一阿占撐下盤！

（有線64周六下午4:45直播）

喺澳職10連勝嘅「流浪者」，今場只要再贏，就肯定可成為常規賽冠軍。不過佢哋今場有唔少隱憂，中場艾朗穆爾、普蘭斯同靴斯3大主力因傷患同停賽缺陣，雖然小野伸二痊愈復出，但狀態始終無保證，條中場線突然變得七零八落，搞到教練賽前要急急腳提升3件預備組球員上嚟候命，今場未必話贏就贏。

由於目前排第5位嘅FC悉尼同第8位嘅珀斯光輝只得3分距離，要保住前6名季後賽資格，最後兩場實行要當決賽咁踢。意大利前鋒迪比亞路賽前仲鼓勵隊友要踢得更有紀律，好在佢哋位35歲後衞尼爾今場復出，有呢位前布力般流浪球星壓陣，條防線更穩陣之餘，前線就可以放膽去攻，搶分得手都唔係無可能o架！

頂占筍盤：FC悉尼（下盤）