科特迪瓦「-2」省招牌

猪拉多纳

新魔獸降世強攻岡比亞

世界盃非洲區外圍賽爆發「象蠍大戰」！一月喺非洲國家盃慘遭滑鐵盧嘅「大象兵團」科特迪瓦，今晚將會收拾心情，喺C組分組賽坐鎮主場出戰岡比亞，雖然有隊長兼射手杜奧巴被拒諸門外，但證明主帥林武治以態取人，況且沙洛文卡勞、謝雲奴、韋菲特邦尼個個弗到震，火力全開，誓炒曳到冇朋友嘅「蠍子軍」岡比亞，「讓球主客和」讓到二球都冇有怕，照捧科特迪瓦「讓球主勝」。

（周日凌晨1時開賽）

一月喺南非舉行非國盃決賽周，科特迪瓦殺聲震天，豈料杜奧巴受到轉會問題困擾影響狀態，喺八強不敵最終盟主尼日利亞，大熱倒灶。科軍主帥林武治痛定思痛，今次大膽棄用「魔獸」，並直言杜奧巴8個月內3度轉飯鑊，導致狀態下滑，寧願畀呢位老將喺加拉塔沙雷慢慢調整。林武治喺球員時代踢過帕爾馬、國際米蘭，經驗豐富，用人不拘一格，唔會因為你係大牌球星就一定坐穩正選，連對住「魔獸」都敢說不，夠晒吉士。
人才濟濟飛甩杜奧巴

從另一面去睇，科特迪瓦人才濟濟，除咗沙洛文卡勞同謝雲奴有回勇迹象之外，仲有韋菲特邦尼橫空出世，呢位喺荷甲搵食嘅前鋒，今季已經為維迪斯轟入26球，臨門一腳亦異常冷靜，難怪被喻為「新魔獸」。適逢大佬杜奧巴缺陣，韋菲特邦尼仲唔趁機爭取表現博上位咩！對手岡比亞不但於世界排名僅列第144位，狀態亦曳到冇朋友，近九仗未贏過之餘，更輸過畀坦桑尼亞、納米比亞等弱旅，見到都唔開胃，作客志切一洗頹風嘅「大象兵團」，睇嚟都係聽炒格局，「讓球主勝」值得捧場。