國足遇「克」星寧博「讓客」

猪拉多纳

喺亞洲盃外圍賽C組首戰落筆打三更不敵沙特阿拉伯嘅中國，今晚返到主場喺長沙賀龍體育中心迎戰實力分子伊拉克。雖則國足今戰有外流世冠盃冠軍哥連泰斯嘅陳志釗首度入選，擔任進攻奇兵，不過球隊近排正陷信心危機，主帥甘馬曹明顯教唔掂班波，仲點讓得起客軍？今場我博1.72倍「讓客」！

（中央5台周五晚7:35直播）
伊拉克主帥曾任國足教頭

近6戰錄得2和4負嘅國足，上輪造訪沙特輸咗1:2，今晚對伊拉克許勝不許和。近期盛傳帥位不穩嘅甘馬曹，今次點兵雖然搵嚟9個班霸恒大球員入伍，但球員踢國家隊信心不足先係迫切要解決嘅問題。雖然國足今次首次召入腳法同速度都唔錯嘅陳志釗，佢喺日前分隊賽仲即刻入兩粒證明狀態好Fit，不過考慮到佢適應需時，有冇貨交好難講。

對手伊拉克上月搵嚟塞爾維亞教練福拉多接手領軍，今鋪係佢首度帶隊當然想省招牌。要知道呢位57歲老帥07年教過國足，馮瀟霆同鄭智等都跟過佢，對國足自然有一定了解。論實力前年世盃外圍賽曾經雙殺國足嘅伊拉克，點都應該秤先多少，射手尤尼斯更係國足剋星，今晚點睇都唔易輸！

亞洲盃C組