阿根廷教訓委內瑞拉

猪拉多纳

畀二打六寸佛都有火

話就話阿根廷喺世界盃南美洲區外圍賽排榜首，出線2014世盃決賽周坐定粒六，不過呢支南美勁旅喺外圍賽期間嘅唯一敗仗，就正正係衰畀聽朝對手委內瑞拉腳下，賽前委內瑞拉守將維斯卡朗度仲狂寸美斯冇料到，堂堂球王畀個二打六咁踩法真係佛都有火，今鋪主場出戰肯定搵甩皮甩骨嘅委內瑞拉出氣，讓2球照捧2.12倍「讓主」！

（有線61及201周六早上8:00直播）
馬斯真蘭奴：「起碼攞多6分」

阿根廷目前揸住20分排南美洲區榜首，老大哥馬斯真蘭奴同薩巴列達賽前呼籲隊友咪鬆懈，起碼要攞多6分先叫做穩陣，加上主帥沙貝拉前日已經喺布宜諾斯艾利斯安排咗早、午各一課操練，又搵埋青年軍落場踢對抗賽，備戰態度非常認真。雖然話翼鋒迪馬利亞要停賽，加高同阿古路亦都因傷無緣披甲，不過阿根廷中前場大把人使，單係美斯搭住拿維斯同希古恩呢個攻擊鐵三角都夠照啦！

講開美斯，呢位仁兄近3場球會賽事為巴塞隆拿喪入5球，腳風順到不得了，偏偏委內瑞拉中堅維斯卡朗度就唔識死，先係話首循環贏阿根廷1:0場波嘜到美斯一戙都冇，跟住又話唔使特登制訂戰術去對付佢，大口氣到飛起。

係有料就唔怕寸，但維斯卡朗度寸人前都唔該睇睇形勢吖，佢嘅後防拍檔阿武列比達打咗柴好大機會缺陣，球隊靈魂艾蘭高上場喺德甲鬥漢諾威場波又整傷左腳退下火線，聽朝就算紮住上都肯定影響演出，攻不銳守不穩仲走去辣慶美斯？盞自己攞嚟衰！