法國食「魯」唔易揀細

猪拉多纳

另一場歐洲區I組世盃外，法國於主場惡鬥豬頭骨格魯吉亞，由於下仗要同西班牙進行榜首大戰，「高盧雞」今仗只求擸晒三分唔會去盡，不過格魯吉亞以防守硬淨見稱，強如西班牙之前對住佢哋都吃盡苦頭，況且法國箭頭賓施馬近況一般，靠佢攻堅蛇都死喇，呢場波隨時處於膠着狀態，寧捧入球細。

（now 714周六凌晨4時直播）

自從98世盃冠軍隊長迪甘斯接掌法國隊帥印後，其功利主義已深深植入球隊，不求比賽過程如何，贏波擸三分先係最重要，迪帥於球員時代係鐵血防中，因此非常注重防守體系，之前兩仗熱身賽輸畀德國，純粹因為試陣，今仗正式比賽必穩陣行先，唔會亂來。由於法國依家同西班牙同分，迪帥一定要為下仗硬撼「鬥牛國」作準備，主場對住格魯吉亞必有所保留。
賓施馬遭釘牌態沉

其實法國幾名鋒將近況亦麻麻，箭頭賓施馬唔單止於皇馬失掉正選位置，之前因超速駕駛被罰款兼吊銷牌照，認真是非多多，咁樣點可以專心踢好波呢，至於拜仁國王列貝利亦有微傷或影響表現。格魯吉亞深明技不如人，因此有自知之明先做好防務，成效唔錯，於四場世盃外全部開細之餘，之前主場擺出鐵桶陣頑抗西班牙，搞到佢哋老鼠拉龜冇碇埋手，守到成86分鐘先輸波，證明呢舊豬頭骨的確唔易啃，隨時令法國陷於苦戰。