西班牛法國雞分途衝刺

猪拉多纳

I組雙雄決戰前夕遇弱旅

世界盃歐洲區外圍賽今晚重燃戰火，其中西班牙同法國喺I組同得7分，並且將於下周中正面交鋒，隨時影響出線形勢，今仗雙雄雖然主場分戰弱旅作熱身，但心態大不同，「鬥牛國」人強馬壯，迎戰弱旅芬蘭勢必大開殺戒，相反法國或會為下仗留力，遇上硬淨到暈嘅格魯吉亞，絕對唔易啃。
西班牙搶芬冇難度

向衞冕世盃之路進發的西班牙，今晚於世盃外主場迎戰芬蘭，雖然中場核心沙維因傷缺陣，但近況回勇的射手韋拿難得正選，一定搏盡數胡，大勝一場為下仗惡鬥法國壯聲勢，「讓球主勝」不容錯過。

（now 632周六凌晨3時45分直播）
韋拿重獲正選實搏

儘管明知沙維有傷在身，但領隊迪保斯基依然召佢入伍，明顯係為咗下仗硬撼出線勁敵法國的榜首大戰，因此迪帥事先張揚今仗會畀呢位老將抖下，由於只係對住呢組包尾大幡芬蘭，以西班牙的人腳實在游刃有餘。其中「鬥牛國」歷來首席射手、近年飽受傷患困擾的韋拿，已鐵定自2011年10月之後，再度為西班牙於正式賽事首發上陣，佢近期於巴塞重拾主力位置，呢位射術精湛的前鋒，無論出任中鋒定左翼都交足貨，表現漸入佳境，今仗難得有正選兼遇弱，仲唔入多粒騷下哥利冧迪帥咩，戰意唔使懷疑。

除咗韋拿之外，其巴塞隊友柏度洛迪古斯披上西班牙戰衣分外醒神，自歐國盃後七場比賽，呢位走位飄忽的翼鋒，竟然狂轟九粒，即時令到費蘭度托利斯、蘇爾達杜、洛蘭迪等中鋒冇碇企，成為迪保斯基無鋒戰陣的新寵兒。芬蘭積弱多時，自列馬倫及希比亞等名將之後，踏入青黃不接階段，依家仲要靠前車路士射手科素擔大旗，明顯後繼無人。