清水盃賽專家甲府有難

猪拉多纳

每逢國家隊有比賽，基本上所有頂級聯賽同盃賽都要讓路，唯獨日本聯賽盃就專喺國際賽期上演，唔少參戰球隊都缺少星級主力，如果大家單純以開季頭3場聯賽去預測日聯盃，就好容易出事。

由於日聯盃冠軍並唔能夠取得亞冠盃資格，只能夠與應屆南美球會盃冠軍踢一場贊助盃賽，所以一向不受重視，而且分組賽要踢足6場，成本都幾高吓，故參戰隊伍都索性派遣小將吸收經驗，所以除咗要考慮有幾多國腳被徵召之外，昔日日聯盃戰績亦好有參考價值。
近5屆日聯盃4度躋身8強

論近年日聯盃戰績最佳隊伍，肯定首推兩連霸嘅鹿島鹿角，不過佢哋喺首輪分組賽輪空，所以退而求其次推介清水心跳，佢哋近5屆都要由首圈打起，有4次出線8強階段，上屆僅於決賽不敵鹿島屈居亞軍，今午喺A組頭炮主場迎戰甲府風林，由於佢哋並冇主將入選國家隊，無論人腳同決心都齊備。

對手甲府風林由於有上季日乙神射手達維離隊，升班後仍未企穩陣腳，未開齋之餘更有前鋒松橋優坐波監，唔容易爭取今季首捷，今場「富士山打吡」要撐清水2倍主W。

（開賽時間：周三中午12:00）

日聯盃A組
日聯盃分組形勢

A組：磐田山葉、川崎前鋒、大宮松鼠、清水心跳、橫濱水手、甲府風林、湘南比馬

B組：新潟天鵝、大阪櫻花、FC東京、鹿島鹿角、大分三神、鳥棲砂岩、名古屋鯨魚

賽制：14支毋須參與亞冠盃之日職球隊，分兩組進行單循環分組賽，每組首、次名躋身8強淘汰賽。