港越大戰喜見波總做到嘢

猪拉多纳

嚟緊係國際賽檔期，全世界啲波停晒打國際賽，香港隊周五亦有一場亞洲盃外圍賽對越南，雖然今場波同國際七欖撞期，但大家都聞到港越大戰嘅氣味，波總亦總算摸到港隊同球迷需要，先改革新獎金制度，又同贊助商配合搞宣傳，睇嚟周五晚旺角場會係一場爆棚波。

本地波入座率長期偏低，但唔代表球迷唔關心本地波，所謂趕客容易請客難，球迷唔願入場睇波嘅原因太多，但要引番球迷入場，波總實在責無旁貸，例如今次港越大戰，波總似乎終於開竅。

港隊需要乜？想知道其實話難唔難，呢啲道理鐵布衫早就講晒畀大家知，話說當時金剛腿踢咗個波上天，當大家等個波跌番落黎嘅時候，鐵布衫趁得閒同人講電話時話：「你站喺我立場諗吓……咁咪係囉！」今次波總最大改變，就係終於肯站在對方立場去諗，令球圈氣氛大大改善。
不論輸贏 改革起點

波總公布港隊獎金與國際足協積分排名掛鈎，每得1分獎10蚊確實令到士氣大振，更係鳳凰計劃推行以來最到位嘅改革，皆因波總出成幾球嘢請CEO又請教練，但係落場搏殺嘅球員只得五舊水，你話班球員望住幾百萬年薪嘅CEO同教練，心裏面諗乜？

賽事宣傳方面，暫時見到波總同贊助商都算合拍，大家有交流，比起以前淨係識向贊助商收錢，其他嘢就關人個關嘅態度亦有好大進步，衷心希望周五之戰會係場爆棚波，不論輸贏，亦係港足改革嘅真正起點。