熱刺又演入球騷

猪拉多纳

上周中歐聯及歐霸盃賽果正路得嚟又充滿驚喜，大家都估到巴塞隆拿同國際米蘭會贏，但又估唔到佢哋可以贏到咁大比數。有人歡喜自然有人愁，國米雖大勝一仗，但都要輸一個作客入球而出局。

熱刺就梗係呢場波嘅得益者啦，其實上周中嘅大敗都係因為佢哋有啲輕敵，加上國米已經睇通熱刺條路，結果稍不留神就連失幾球，情況同上周作客利物浦如出一轍。

熱刺最近兩場都輸波，今仗返主場當然好想一吐烏氣，尤其加里夫巴利對上六場聯賽五場有波入，首名入球當然係大熱之選。早前有傳皇家馬德里想用7,000萬歐元（7.1億港元）撬佢過檔，熱刺即刻出招加人工兼承諾球隊一定有歐聯踢，現階段為保前四勢必去盡！話雖如此，富咸絕對唔會輕易將三分相讓，皆因佢哋近況唔錯，最近五場聯賽只輸過畀曼聯，前線主力貝碧托夫近期總算「有貨賣」，再加上熱刺上周中歐霸盃踢足百二分鐘，富咸今仗絕對有機會偷雞入波。可惜，富咸作客失球數字驚人，近八仗作客平均每場失兩球，加上熱刺近七次主場錄得六大一細的戰績，小妹預期今晚會係一場入球「大」戰。

（有線201及301台周日晚11時直播）