熱刺攰爆 富咸驚輸 利開「半場細」

猪拉多纳

熱刺勁攰又驚多失，今晚「倫敦打吡」主場鬥富咸相信會睇定嚟食，半場冇乜交收非常正路！熱刺剛於歐霸盃搏到殘，近兩仗後防又勁失波，必會增強防務。佢哋本季聯賽換邊後嘅入波，數量係上半場一倍有多，加上往績支持，一於捧「半場細」。

（有線301及201台周日晚11時直播）
畀國米扯乾 無力喪攻

自從加里夫巴利變身「超級薩亞人」瘋狂入波後，熱刺喺聯賽同歐霸兩條戰線一直都順風順水，但上周聯賽被利物浦反勝3比2，上周中作客國際米蘭全場被對手圍攻，結果踢埋加時大敗1比4，雖然僥倖以一個作客入球出線，但飽食驚風散之餘，體力更被扯乾，只抖3日又要出戰。由於之前兩仗失咗7粒咁多，相信領隊保亞斯檢討之後，今仗會先要求後防更加集中，而富咸作客出咗名攻力疲弱，佢哋亦冇非勝不可嘅壓力，因此上半場好難會出現大手交易。其實熱刺於剛過去周中歐霸盃踢足120分鐘，要佢哋再玩喪攻，睇嚟亦係有心無力。
習性難改 下半場嚟料

睇番統計，熱刺本季聯賽上半場僅入15球，而下半場就入35球，好明顯佢哋鍾意換邊後先至發力。呢種踢法令球隊本季29場聯賽，有20場都開半場細。雖然今場熱刺有加里夫巴利、丹普西復出，艾朗連儂又或復任正選，但都好難改變佢哋呢個習性。

至於富咸自己知自己事，作客將以防守行先。佢哋之前造訪曼城、曼聯同車路士都大打穩陣波，結果單計半場，一場守和0比0，另外兩場都只係落後0比1，因此「半場細」係拿仁今晚嘅心水。