愛華頓士氣曳曼城有計

猪拉多纳

防線失魂冇埋正選門神

今晚英超早場由愛華頓主場迎戰近況全面復甦嘅曼城。上周兩軍喺英總8強分途出擊，曼城輕輕鬆鬆大捷入4強，「拖肥糖」就喺主場大敗畀韋根0:3提早畢業。「張峰」認為呢個打擊對「拖肥糖」絕對唔細，此消彼長，今晚曼城要食「糖」話咁易，客勝有1.98倍，抵玩！

（有線200及300周六晚8:45直播）

愛華頓近排黑氣纏身，正選門將侯活背傷休戰6星期，雖然話上仗頂上嘅真梅卡質素唔算太曳，不過講穩健程度同壓場感，就始終未係侯活嗰皮。更令「張峰」擔心嘅，係佢哋嗰條失魂防線，踏入1月尾開始走晒樣，近9戰場場都有失波，夾埋失咗成16球，平均每場執2次波去中圈，真係嚇死你。
藍月亮近4戰入12粒

講開愛華頓條穿窿防線，「張峰」最信唔過嘅就係希汀加喇，無可否認呢位荷蘭國腳係通天老倌，可以勝任後防多個位置，但佢衰在周身刀冇張利，佢有份踢嘅比賽例牌多甩漏，上仗就係佢連環蝦碌，搞到愛華頓大敗，今晚搵佢去Mark泰維斯同迪斯高呢啲高質前鋒，想保住清白之身？妄想啦！

雖然曼城喺聯賽落後曼聯12分，衞冕機會極之渺茫，但係領隊文仙尼早前講過唔會放棄聯賽，又係喎，佢哋家陣聯賽2連勝之餘，足總盃又連過2關，近4仗夾埋攻入12球，鋒力同狀態都夠晒保證，最抵讚係前鋒泰維斯場場有貨交，今場隨時又省番幾粒。另一樣值得文帥高興嘅，係曼城條防線終於回穩，近4戰仲錄得零失球添，今晚佢哋係時候打破近3季作客愛華頓不勝嘅劣績喇！
曼城連續4仗0失球

‧愛華頓前鋒謝拉域對上一次入波係1月8號。

‧雙方近5次喺葛迪遜公園交手未試過和波。

‧曼城已經連續4仗保持0失球。
泰仔續約「首」得雲開

曼城家陣落後榜首嘅曼聯12分，餘下賽事真係再冇失分空間，預計今仗作客都會採取主動，要撕破近9仗場場有失波嘅愛華頓防線有幾難？泰維斯上場足總盃先大演帽子戲法，賽前仲有消息指會方準備同佢續約，狀態同心情一樣咁好，「首入」唔揀佢揀邊個吖？