漢堡博洗底狂剷奧堡

猪拉多纳

雖然執筆時漢堡市落緊雪，不過球迷近日心情相當唔錯，記得開季3連敗嘅時候，我哋曾經擔心過，德甲歷史上唯一全勤嘅漢堡，會唔會喺第50屆德甲首次降班？但如今踢完25輪，我哋位列聯賽榜前6，落後第4位嘅史浩克04只有1分，甚至有機會挑戰下屆歐聯參賽資格，雲達華治、艾達、孫弘民、魯迪尼夫斯同教練芬克成為球迷崇拜嘅人物，Oliver真係戥佢哋開心。

芬克帶領漢堡重上正軌，除咗因為佢能夠將適當球員放喺適當位置之外，最重要嘅係佢一向計算精確，對全盤賽程有周詳部署，知道邊啲波更有把握攞分，晨早已經作好人腳調動安排。漢堡今晚主場對排名比佢哋低10位嘅奧格斯堡（周六晚10時30分開賽），3分絕對志在必得。
主力搏殺恨食第5黃

值得留意一點，係漢堡陣中多名重心球員包括艾達、戴克美亞、馬素贊臣、雲達華治同魯迪尼夫斯已經累積咗4面黃牌，為咗避免停賽影響球隊實力，近期佢哋喺陣上表現都有啲窒手窒腳，不過基於球隊下輪將會作客面對拜仁慕尼黑，芬克預咗搶唔到分，所以好樂意見到呢班主力球員喺今場攞第5張黃牌，等下仗預咗輸嘅場合停賽，洗底之後喺餘下賽事就可以更加放心搏殺，今場漢堡眾將唔會有保留，對客軍衝撞飛剷在所難免，整定奧格斯堡唔好彩。

奧格斯堡踏入今年確有進步，池東沅、具滋哲同摩達斯嘅攻擊組合演出惹人好感，但同漢堡嘅孭飛球星相比仲差一皮，加上人腳配搭唔平均，能夠保住尾3席位踢護級附加賽已經係佢哋最大目標，以上輪主場輸畀紐倫堡嘅庸劣水準，今場作客唔夠漢堡踢，Oliver對1.72倍嘅漢堡主Ｗ好有信心。
Oliver 推介：

漢堡勝 ★★★★

拜仁慕尼黑上盤 ★★★

漢諾威讓球勝 ★★★