馬拉加贏「波」爭出線

猪拉多纳

聯賽盡收主力抖到足

今晚歐聯16強次回合，馬拉加會喺主場再戰葡萄牙班霸波圖，務求收復首回合落後0:1嘅劣勢。論近況，馬拉加絕對唔合格，入波更寥寥可數，如果今場仲唔及時反彈，晉級真係凍過水，不過今晚張峰決定嚟個逆思考，博佢哋返到主場背城借一，會踢出翻身仗，平手盤捧得過。

（有線62及202周四凌晨3:45直播）

馬拉加近4戰得2和2負，仲要只係得中堅迪米捷利斯入過1球波，表現認真麻麻，不過教練比歷連尼喺上場西甲作客賽和華拉度列，正選陣容收起伊斯高及祖亞昆等攻擊主力，就係為咗部署今晚嘅反擊戰，誠意夠晒。

雖然馬拉加嘅級數唔可以同皇馬、巴塞相提並論，但係佢哋踢法都係偏向主攻，一旦攞到主動權，要入波唔係一件難事，只要沙維奧拿、辛達告魯斯同祖亞昆等攻擊好手生生性性，着番對射門鞋，張峰深信晉級8強嘅主動權仍然喺佢哋手上。何況根據尋晚最新消息，佢哋件巴西10號仔巴迪斯達亦可以復山添！
波圖作客死守冇着數

波圖首回合藉主場之利，佔盡甜頭底攞到1:0嘅優勢到次回合，只要今晚後防唔失波就可以晉級，作客部署上肯定會偏向保守。不過正所謂久守必失，一個失誤、落後一球，就會還原到起步點，到時身處喺馬拉加個主場，可唔可以踢番出首回合水準，真係一大疑問，呢個亦係我支持馬拉加贏波嘅原因。

首回合：馬客負0:1