阿仙奴殘陣上刑場 拜仁處決槍手

猪拉多纳

首回合阿仙奴1:3拜仁慕尼黑

歐聯16強次回合壓軸好戲，拜仁慕尼黑主場迎戰阿仙奴，拜仁首回合贏3比1，晉級機會高唱入雲，理應可以歎慢板，但呢支德甲班霸體內只有進攻DNA，大把在手亦唔會赦「槍手」（Gunner）。同埋佢哋上屆決賽喺自己地頭將冠軍寶座拱手讓畀另一支倫敦球隊車路士，今次更加要趁機數爆阿仙奴洩憤。阿仙奴「槍王」韋舒亞倦勤，防線人腳亦不齊，根本無法招架，「讓球主勝」1.83倍值博。

（有線61及201台周四凌晨3時45分直播）

拜仁慕尼黑陣容唔算完整，中場舒韋恩史迪加及中堅謝路美保定停賽，翼鋒列貝利因傷倦勤，但球隊勝在兵源充裕，路爾斯古斯達禾同雲拜頓足以彌補兩位坐波監球員空缺。列貝利嘅位置由洛賓頂上，亦無損威力。
洛賓爆破阿仙奴缺口

事實上，洛賓嘅速度正好剋死阿仙奴守將轉身慢嘅弱點，最明顯例子莫過於上輪英超，熱刺兩位快翼加里夫巴利及艾朗連儂，倒模式以速度插穿阿仙奴後防入波。「槍手」今仗仲要鬧左閘荒，或需由中堅華美倫客串左後衞，佢面對洛賓，恐怕只能食塵。

阿仙奴屋漏兼逢連夜雨，防線唔齊腳之餘，中前場亦殘缺，大腦韋舒亞受傷，難以披甲。加上首回合為球隊破蛋嘅普多斯基有傷在身，單靠禾確特個人突破，實在獨力難支。

最弊係「槍手」形勢上冇得揀，想晉級只能焗攻收復失地。咁做正中拜仁下懷，令主隊文迪蘇傑、湯馬士梅拿等進攻猛將有更多發揮空間。
曾遭逆轉拜仁會醒定

值得一提，歐聯92年改制後只出現過兩次首回合作客贏波球隊，次回合主場輸波出局。其中一次就係10/11年度球季16強，拜仁先贏國際米蘭1比0，但之後輸2比3，因作客入球唔及對手而被淘汰。拜仁眾將士對呢次慘痛教訓仍然歷歷在目，絕對唔會容許歷史重演，勢必再炒阿仙奴，令對手冇翻身機會。
拜仁慕尼黑出線條件

‧贏或和

‧淨輸1球或輸0:2

‧輸1:3，需要加時分勝負
阿仙奴出線條件

‧淨贏3球或以上

‧淨贏2球，並必須入4球或以上

‧贏3:1，需要加時分勝負