CF格蘭納達乘機搶分

猪拉多纳

薩拉戈薩天殘地缺

今輪西甲尾場由兩支護級球隊對決，薩拉戈薩會喺主場迎擊CF格蘭納達，主隊踏入2013年後狀態低沉，近10場未贏過之餘，仲慘受傷兵影響，就算今晚遇上3連敗嘅CF格蘭納達，相信都冇乜計仔可即時反彈，1.7倍「讓客」有得諗！（開賽時間︰周二凌晨3:30）
攻不銳守不穩難讓波

薩拉戈薩歇冬後都唔知撞咗乜嘢邪，西甲連盃賽踢咗12場，只係1月初贏過利雲特，之後就表現大跌Watt出現10戰不勝嘅差勁局面，當中仲要有7場食白果，夾埋只係出現過4次破門。其實都難怪嘅，成班波只靠前鋒普斯迪加一個識入波，其餘中前場球員就好似夢遊球場咁，冇乜建樹可言，只要成功箝制呢位葡萄牙箭頭，已經可以廢晒佢哋全隊武功？

最慘係薩拉戈薩賽前仲傳出前鋒查維阿拿姆、中場蘇古連尼、盧卡斯韋查斯、艾邦奴、門將羅拔圖占美利斯齊齊報稱有傷倦勤，守將盧雲斯又要坐波監，幾乎冇咗大半隊，攻不銳守不穩居然都要讓波，都係避之則吉好。
射手恩哈路腳風順

另邊廂嘅CF格蘭納達，雖然都有射手巴謙美、中場耶巴達同丹尼賓尼迪斯打柴，但作客成績其實唔算太曳，近5場就攞到2勝1和2負。值得留意嘅係班波火力有番咁上下，即使對住皇馬同巴塞都有辦法送個波入網窩，而射手恩哈路亦腳風頗順，近4場射入3球，以薩拉戈薩近5戰都要失守嘅防線嚟講，真係幾難睇得住佢！
雙方怕輸齊踢守「細」波

翻查記錄，薩拉戈薩上年兩次喺主場同CF格蘭納達交手，總入球都係得1個，而且呢兩支護級球隊嘅狀態都唔係咁掂，相信佢哋都會先求穩守，唔會立亂喪攻，咁嘅情況，入波應該唔慌多，1.62倍「入球細」當然博得過。