國米甩皮甩骨「博」唔過

猪拉多纳

啱啱喺歐霸盃作客吞咗熱刺3蛋嘅國際米蘭，今日回歸意甲主場出戰博洛尼亞。藍黑軍團傷兵滿營，防線漏洞多，對住回勇嘅博洛冇咩甜頭可言，不妨冷敲受讓嘅博洛成功搶分而回，2.1倍「讓球客勝」抵玩。

（廣東體育周一凌晨3:45直播）
博洛往績唔輸蝕

國際米蘭傷兵真係多到數唔晒，好似前鋒迪亞高米列圖、守將長友佑都、馬迪亞斯施維斯達、森美爾、門將卡斯迪拿斯等人齊齊受傷。首席門將漢丹洛域又要坐波監，對近2場失5球嘅防線嚟講真係雪上加霜。而且呢支「過氣」意大利勁旅喺聯賽頻頻失分，近11場只係贏得3場，就算今場坐鎮自己地頭都難言穩勝。

博洛尼亞連勝2場之餘近6場聯賽只曾1敗，早前佢哋喺意盃就成功逼和國米，今季又試過作客打敗拿玻里同羅馬，所以咪以為佢哋輸梗。若非中場彭拿基奧迪斯干尼同後衞拿達利唔踢得，重演上季聯賽作客砌低藍黑軍嘅歷史都唔奇添！