紅藍激戰 曼聯全力拆殘車

猪拉多纳

英格蘭足總盃今晚上演8強戲肉，由曼聯主場迎戰車路士。雙方同樣剛喺歐洲賽失利，不過曼聯就慘情啲，由領先1:0到拿尼一個爭議犯規被紅牌驅逐搞到輸波。紅魔惟有將目標放喺餘下嘅足總盃同聯賽身上，今晚主場出擊，大有機會用番朗尼擔正拆「殘車」，一於撐曼聯1.7倍主W啦！

（now635台及廣東體育周一凌晨0:30直播）

紅魔雖然喺歐聯主場輸波兼出局，但佢哋表現一啲都唔曳，一度令到皇家馬德里嘅進攻老鼠拉龜，無從入手，更加藉住反擊同死球戰術造成一定威脅。其中為曼聯上陣達到1,000場里程碑嘅傑斯全場比賽滿場飛，表現同活力絕對唔似39歲老將，令人佩服。
紅魔本土4個月不敗

不過以費Sir嘅習慣，今晚應該會畀傑斯抖抖，由香川真司負責派牌，朗尼就好大機會復任正選夥拍尹佩斯攻堅，前線把握力更有保證。再講紅魔喺本土比賽有成4個月未輸過，狀態咁Fit，今場就算對住車仔都未驚過啦！

車路士自從由賓尼迪斯接手後，表現一路都好飄忽，嚴格嚟講唔算係好，況且球迷對賓帥嘅反對聲音一直唔少，球員亦開始對佢有怨言，內部立立亂，士氣又點會好吖？
賓帥冇人撐士氣差

你睇吓堂堂上屆歐聯冠軍，上場降格踢歐霸盃對歐洲3線球隊布加勒斯特星隊以0:1見負，家陣嘅藍戰士絕對係一架「殘車」，再過多一星期隨時宣布今季四大皆空都唔奇，今晚作客奧脫福真係凶多吉少。
張峰來料：曼聯（主勝）

英總賽制

今輪為英格蘭足總盃8強賽事，打成平手需擇日重賽。
車仔連開12口「半場細」

‧曼聯近15戰半場不敗，有10場「半贏」及5場「半和」。

‧車路士近12場賽事全部開出「半場細」。

‧對上4圈足總盃，車仔全開「入球雙」、曼聯半場不敗。
信往績博曼聯「半贏」

曼聯18場不敗強勢雖然啱啱畀皇馬打斷，不過半場靚績就繼續保持到，除咗近15場未試過半場落後，當中3分2更領先對手，加上喺對上4圈足總盃同樣係半場不敗，信往績不妨小敲開出比率較高嘅曼聯2.25倍「半贏」。
「魔」鬼判官經典執法：2012年　英超　曼聯 3:0 紐卡素

曼聯嘅尹佩斯開肘打人，紐卡素埋門疑似過晒白界全部當睇唔到。
2012年　英超　利物浦 1:2 曼聯

完半場前紅牌驅逐利物浦嘅舒維爾，又被指睇漏兩球12碼冇畀紅軍。
2012年　英超　車路士 3:3 曼聯

下半場中段連醒兩球12碼，造就曼聯作客落後3球都可以追平。
2011年　足總盃　曼聯 1:0 利物浦

開波冇耐判12碼畀曼聯充滿爭議，跟手仲趕埋紅軍隊長謝拉特出場。