紅軍熱刺大駁火

猪拉多纳

本屆英格蘭足球先生兩大熱門硬撼，「哨牙蘇」同「巴利仔」必盡騷哥利鬥入波！英超利物浦主場鬥熱刺，「雙S組合」蘇亞雷斯、史杜列治雙劍合璧威力勁；加里夫巴利勒唔住場場都係show time，兩軍必大打攻擊足球，捧大！

（有線300及200台周一凌晨零時直播）

利物浦近季同熱刺碰頭，都充滿娛樂性，除上季於晏菲路互交白卷戰情較悶外，其餘場場都由頭攻到尾，首循環「巴利仔」做晒主角，轟入1粒後又擺球烏龍，最後熱刺都贏2比1。近年熱刺食住利物浦，近5次交手4勝1和，陣中幾隻快馬如巴利仔、艾朗連儂都搵到着數。事實上紅軍後防如丹尼爾艾格、史卡迪爾或加歷查轉身較慢，依家羅渣士上場後又將防線壓前，中場一甩，後防就畀對手「圍剿」，依家「巴利仔」、艾朗連儂弗成咁，今場幾難唔失波。
蘇亞雷斯力爭神射手

利物浦目前排聯賽第7，差第4車仔10分，要爭歐聯資格機會微乎其微，但呢班波勝在夠士氣，場場班主力都搏到盡好肯去攻，依家球隊其中一個目標，就係全力造就「哨牙蘇」入波做神射手，兼問鼎本屆足球先生。蘇亞雷斯近9仗入9球，目前以21球領先射手榜，再加上史杜列治傷愈復出，今場必喪攻熱刺。雙方快打快下入波必多，大盤1.62倍熱得有理。
施古臣寸爆︰好彩冇揀利物浦

數近期熱刺當紅炸子雞，除加里夫巴利外，肯定係基菲爾施古臣。呢名冰島國腳近3戰轟入2粒，仲頻頻作出助攻，終奠定正選席位。今戰賽前佢狂寸利物浦，話本季初唔騷紅軍選擇熱刺係正確決定，因為踢利物浦，下季就唔會有歐聯踢。

去季於史雲斯踢到曉飛，基菲爾施古臣正式成名，本季初紅軍領隊羅渣士想同佢再合作，佢本身（舌累）飯應，但熱刺突然殺出後，佢就放紅軍飛機。佢話無悔當初決定：「熱刺有好多好球員，下季好大機會踢到歐聯，就係呢點就證明我選擇係啱啦。」

除曼聯、愛華頓外，近年紅軍亦好憎熱刺。本季初除劫走基菲爾施古臣外，仲連丹普西都搶埋，唔少紅軍球迷都寸熱刺唔使搵XX，只要吼實紅軍想買咩人，佢哋跟住出手就得，故利物浦今戰肯定戰意，希望於賽場上教訓熱刺。