慕遜加柏風捲殘雲

猪拉多纳

德甲尾場慕遜加柏主場對雲達不來梅，不來梅新任經理艾欣腳頭認真差，上任3場輸足3場，忠臣教練舒哈夫面臨帥位危機，近期已經接連有球迷喺比賽中高舉要佢「滾蛋」嘅橫額，係佢上任13年來未曾有過嘅尷尬場面，球隊今仗防線仲要超殘陣，作客面對回勇嘅慕遜加柏聽炒格，慕遜加柏小讓平半，上盤固然係信心推介，進取啲可以捧埋有3.8倍嘅「讓球主勝」。

（有線61及64台周日凌晨1時30分直播）
雲達不來梅中門大開

舒哈夫近兩季堅持用「4141」主攻陣式，但始終搵唔到一個可靠嘅防守中場，令到防線所受壓力奇大，雙中堅柏柏斯達夫普路斯同普特爾經常要有好優異演出至可以將失球數字降低，上仗主場對尾三嘅奧格斯堡，基於普特爾停賽，取代佢嘅穆隆高迪冇貨交，搞到防線風聲鶴唳。奧格斯堡雖然作客，但全場射門達15次，其中有12次中框，若然佢哋把握能力好啲，又或者單天保至尊嘅柏柏斯達夫普路斯踢得差啲，不來梅已大敗收場。對於不來梅嚟講，更大嘅不幸係柏柏斯達夫普路斯上仗勇戰下攞埋黃牌，今晚要同普特爾一齊停賽，舒哈夫焗住要用22歲嘅馬迪奧柏夫洛域頂上，呢個球員今季只上陣過45分鐘，喺兩周前對拜仁下半場入替，結果不來梅慘敗1比6，佢嘅演出簡直完全唔夠班，今晚不來梅中門大開真係任人魚肉。

慕遜加柏自歐霸盃作客輸畀拉素出局後，全隊似乎醒番晒，近兩仗聯賽先賽和衞冕多蒙特，跟住作客贏埋前4名嘅法蘭克福，貴價箭頭盧克迪莊上仗入靚波重拾自信，今仗進攻領袖艾蘭高傷愈復出，加上當起嘅小將靴爾文同艾文尤尼斯都速度驚人，有本錢打快攻撕破客軍不穩防線，只要慕遜加柏能夠打開缺口，相信入球會陸續有來，主隊隨時唔只贏一粒。
Alwin 推介：

慕遜加柏上盤 ★★★★★

弗賴堡勝 ★★★

波琴讓球勝 ★★★