雷丁維拉護級大晒冷

猪拉多纳

英超護級大戰雷丁主場對阿士東維拉，有跟開英超嘅朋友都知呢兩隊今季成績有幾差，近幾場比賽表現都令人失望。如果你問鬼Sir邊隊最有可能降班，依家真係答你唔到。既然今場係海軍水兵大鬥法，鬼Sir相信兩隊會踢得較開放，大盤開出機會較高。

（有線302及202台周六晚11時直播）

雷丁自從2月初贏過新特蘭之後，已經連續四場比賽落敗。當中影響最大係主場以○比三不敵韋根。基於護級形勢唔多樂觀，雷丁未來日子都唔使諗咁多，總之就場場搶攻求分數，袋得幾多得幾多。尤其今場對手另一支護級球隊維拉，雷丁肯定會乘主場之利向對手施壓。要留意一點，雷丁下輪聯賽要作客曼聯，要搶分的話當然揀今場啦！
賓迪基谷盡顯身價

維拉現時以24分排行尾三，只係多過雷丁1分，為要盡快上岸今場又點會縮住嚟踢。老實講，維拉攻力真係唔曳，比如前鋒賓迪基及安祖斯韋文波底都幾好。衰在後衞慣性失魂，搞到前場入埋都唔夠輸。但點講都好，現時維拉靠守都冇用，一定要贏波攞3分先至對護級有幫助。剛啱提到賓迪基，最近唔少大球隊都話對佢有興趣。鬼Sir覺得佢喺季尾階段會盡可能表現自己，入多幾粒省靚自己個招牌。就算維拉真係咁唔好彩跌落英冠，賓迪基要轉飯鑊都容易啲。兩支護級球隊今場必攻，大盤揀得過。