華倫焗攻有利入球騷

猪拉多纳

法甲名牌球隊巴黎聖日耳門有中東老細照住，經過一輪招兵買馬後，依家已成為歐洲一線球隊，當然未係最頂級嗰批啦，但喺歐聯都有得爭吓。佢哋首回合作客砌低西甲實力分子華倫西亞，絕對唔簡單，但今場形勢上唔使贏都可晉級，依家讓到半一，要贏兩粒先執晒成個盤，實在唔多抵玩。

（有線61及64台周四凌晨3時45分直播）

巴黎聖日耳門簽埋英格蘭「萬人迷」碧咸，要呢個老將踢足全場梗係唔得啦，但當有需要時搵佢落場處理死球，隨時係一個殺着。今場缺少王牌射手伊巴謙莫域，好多投X人士擔心班波攻力不足，唔敢掂個大盤。不過，業界人士唔係咁睇，華倫形勢上焗攻，形成後防空虛，大把空位畀對手打反擊，呢個情況絕對有利開大，現時入球大分頭唔錯，值得留意。

同日另一場歐聯由祖雲達斯主場對些路迪，祖記首回合作客大炒對手，已經令今場變咗做例行公事，叫得做例行公事，即係開邊瓣都得，佢哋根本冇必要贏波，讓到超過一球過晒火，呢類上盤係最唔抵玩，呢場一係忍手唔玩，如果真係想買多少，肥叔傾向支持下盤。

（有線62及202台周四凌晨3時45分直播）
肥叔心水

些路迪 下盤

巴黎聖日耳門 大