祖記收夠籌玩「細」不攻

猪拉多纳

歐聯16強次回合祖雲達斯主場對些路迪，經過首回合之後相信大家都知兩隊實力有一定差距，「斑馬兵團」帶住三個作客入球返主場比賽，根本冇必要冒險進攻，盡量保持控球在腳已經足夠。賽前祖記教練干地講到明今場會收起主力，等佢哋有足夠時間休息以應付周日意甲。祖雲達斯事先張揚「歎慢板」，相信今場會係悶戰，巨高認為細盤開出機會高。

（有線62及202台周四凌晨3時45分直播）

祖記教練干地表示會收起三名球員，當中包括維達爾、馬治斯奧及列治史迪拿，另外前鋒基奧雲高亦好可能會休息。「斑馬兵團」擺到明當今場比賽係例行公事，求勝意欲可謂相當之低。查實踢過首回合之後，干地已摸清些路迪實力有限，雖然賽前記者會話會認真比賽又話尊重對手，但全部都係廢話。

總之今場祖記多會縮喺後場「搓住踢」，絕唔會無緣無故上前搶攻。大家都知意大利球隊要打進攻足球入多幾粒，真係冇幾多隊做到，但要玩防守戰術悶死對手，對於祖雲達斯或其他意甲球隊嚟講可謂簡單任務。
些路迪落後3粒投降

些路迪能夠打到入歐聯16強已經相當難得，相信球迷以及高層都唔能夠要求更多，加上依家落後三粒咁多，莫講話要出線，就算今次作客要贏番場都唔容易。唔排除些路迪投咗降當呢場係例行公事，疊埋心水返蘇格蘭做土皇帝仲實際。
出線條件

●祖雲達斯贏波、和波、或以2球以下差距落敗都晉級

●些路迪贏3比0將加時再戰

●些路迪以3球或以上差距贏波可晉級

首回合祖雲達斯3:0
數讀歐聯

（0）祖雲達斯近4場歐洲賽0失球及全勝，些路迪近9次到意大利0勝

（5）派路於球員生涯曾5對些路迪

（6）祖雲達斯近6次主場對蘇格蘭球隊獲全勝

（17）祖雲達斯近17場歐洲賽不敗