多蒙特 薩克達 駁火做大騷

猪拉多纳

歐聯16強次回合戰火今晚重燃，雖然大家都將焦點集中喺曼聯對皇馬嘅賽事，但另一場德甲「阿二」多蒙特主場鬥烏克蘭球隊薩克達嘅戲碼亦唔太差，都係生死戰嚟o架。「蜜蜂兵團」首回合完場前憑曉姆斯入波2:2作客逼和對手，手握兩個作客入球搞到薩克達今鋪唔攻唔得，不過多蒙特反擊效率極高，兩隊谷出嚟駁火，一於追多次1.55倍「入球大」。

（有線62及202周三凌晨3:45直播）
蜜蜂兵後防唔集中

雖則話多蒙特有兩個作客入球喺手，今晚只要死守0:0或1:1都能夠出線，之但係呢班波自踏入2月份後，表現明顯跌Watt變得極度飄忽，近7戰就3勝2和2負，當中只得1場能夠保持清白身，後防集中力明顯麻麻。好彩「蜜蜂兵團」班前線球員照樣交足功課，後面失幾多佢哋就入番幾多。

要論數胡人物，又點可以唔提羅拔利雲度夫斯基呀！雖然呢位波蘭射手盛傳季尾會離隊他投，但佢喺每場比賽都照樣冇揸流，上周聯賽就早早射入兩球，帶領球隊3:1擊敗漢諾威重返勝軌，加埋馬里奧葛斯同馬高列奧斯，呢把「三叉戟」實在係入球保證。
薩克達焗攻冇保留

薩克達方面，由於烏克蘭國內聯賽啱啱開鑼，佢哋只能夠透過熱身賽嚟催谷狀態。不過從首回合所見，呢支「烏克蘭1哥」狀態都Keep得幾好，只係完場前畀曉姆斯入波逼和，令到形勢上稍為輸蝕。想出線唔使諗咁多就係要喪攻，睇埋佢哋3場分組賽作客賽事總共入咗8球，證明作客唔足以影響佢哋嘅攻擊力，今場隨時入波仲多過首回合，做球迷嘅就大飽眼福喇！

首回合：多客和2:2