迪基亞關鍵掌門人

猪拉多纳

今晚歐聯16次回合真係好睇過戲，重頭大戰當然係曼聯主場對皇家馬德里，同時間舉行仲有多蒙特對薩克達。上次Peter已經提及過呢四支球隊嘅「卡士」等同準決賽及決賽，無論競技水平及可觀性都相當之高，兩場比賽喺首回合都係打和，究竟邊兩隊可以留低繼續，真係要考考四位主帥嘅功力。
Keep到水準曼聯有計

先講曼聯主場對皇馬，雙方都係由星級主帥帶領星級陣容。睇過首回合對賽之後，Peter覺得兩隊實力好接近，就算曼聯喺奧脫福出戰亦講唔上有好大優勢。老土啲講句今場好睇球員臨場發揮。有時踢大賽好奇怪，若然球員心理質素差，經唔起大賽壓力的話，隨時會無影無蹤。特別想提及曼聯門將迪基亞，Peter深信呢位西班牙門神將成勝負關鍵，首回合迪基亞使出渾身解數抵住皇馬來犯，如果佢今次再有良好表現，曼聯好有機會晉級。尤其今場好有可能要加時甚至靠互射十二碼分勝負，屆時迪基亞所肩負嘅責任就更大。

至於多蒙特主場對薩克達，又係兩位有料教頭一次大比併。多蒙特高普勝在後生有活力有諗頭，薩克達嘅盧捷斯古執教經驗豐富，同樣都係一位足智多謀嘅教頭。論到出線機會Peter就睇高多蒙特少少，佢哋崇尚踢整體悅目足球，相信好多球迷都希望呢支德甲球隊可再晉一級，繼續為大家提供娛樂。

金句：四個大師，二個留低的今晚夜