蜜蜂仔叉足電夠薩

猪拉多纳

好多次曼聯有份踢歐聯比賽我都放假，今晚終於輪到我講曼聯對皇家馬德里呢場歐聯大戰喇，大家記得去球彩台或者高清203台捧吓場啊！曼聯呢場睇就好，投X就有啲難度，反而另一場多蒙特對薩克達我就更有心水，由於歐聯係「蜜蜂仔」依家唯一希望，加上西法倫主場威力強勁，一於投X主勝等收錢！

多蒙特首回合作客薩克達二比二打和，兩度逼和對手，有兩個作客入球在手，今場晉級形勢大好！佢哋今季喺德甲畀拜仁慕尼黑大幅拋離，其中原因就係多蒙特將專注力放喺歐洲賽。依家聯賽三連冠無望，上周又喺德國盃畀拜仁踢埋出局，爭標希望得番歐聯一瓣。上場主場三比一贏漢諾威，高普刻意收起右閘比薛斯基、中堅曉姆斯，中場馬里奧葛斯同馬高列奧斯亦踢唔足全場，成隊波尤其下半場已經明顯拖慢節奏，慳番啲體力準備今場。初盤見多蒙特讓半一，主勝1.52倍左右，顯然莊家睇好主隊多啲。

不過要留意，烏克超由十二月至二月都歇冬，上周先至重開，其實都有利「薩軍」集中精神準備今場歐聯，加上佢哋踢法同多蒙特都係着重地面進攻，即使韋利安走咗，仲有箭頭雷斯阿祖安奴、中場阿歷士泰斯拿同費蘭甸奴等幾個巴西球員，有腳法又有速度，另外米希達利恩今季腳風都好順，所以我認為今晚就算佢哋贏唔到，都唔會畀多蒙特大炒，買主勝啱數。