熱刺 阿仙奴打吡「大」戰鬥入波

猪拉多纳

宿敵碰頭鑊鑊飛沙劈石

同市宿敵熱刺同阿仙奴近年鬥餐飽，今季兩隊繼續為歐聯資格搏命，今晚肯定踢到飛沙劈石。兩隊波近況不相伯仲，加里夫巴利同辛迪卡索拉等球星又着晒火，預料會延續近年「球迷奇遇記」式入球騷，捧1.62倍入球大！

（有線200及300、廣東體育周一凌晨0:00直播）
熱刺迪科爾有望復出

一直畀阿仙奴「食住」嘅熱刺，依家竟然壓住車路士同阿仙奴排第3位，暫時成為「倫敦一哥」。佢哋可以踢到咁犀利，加里夫巴利當然居功至偉，呢位威爾斯球星近6場比賽入咗8球，幾乎係單天保至尊，賽前有消息話迪科爾今場都有機會復出，加埋倒戈嘅艾迪巴約，呢條鋒線足以攻破阿仙奴大門啦！
廠仔4虎入球達雙位數

對家兵工廠條防線無疑信唔過，不過佢哋嘅鋒力仍然值得信賴，禾確特、普多斯基、辛迪卡索拉同基奧特今季嘅入球數字都達到雙位數，證明呢隊波攻擊點非常分散，熱刺後防絕對唔係盯住一、兩個人就可以安枕無憂。再者，阿仙奴依家只排第5位，要重返頭4位今場真係非勝不可，進攻意欲更加鮮明。

大家唔善忘嘅話，都會記得呢兩隊波近年交鋒都係大手交易，今季首循環碰頭阿仙奴主場就贏5:2，同上季次循環嘅賽果一樣，前季兩隊亦試過踢成3:3同熱刺贏3:2，幾乎每次對碰都係有前無後、打死罷就格局，今場幾大都要再追入球大啦！
熱刺主場交鋒6戰不敗

‧熱刺近6場主場對阿仙奴取得3勝3和。

‧兩軍近5次交手全開大。

‧熱刺翼鋒加里夫巴利近6場入8球。

‧阿仙奴近7場作客取得4勝2和1負。
熱刺搏盡報仇撐埋主W

熱刺近年喺主場鬥阿仙奴未輸過，加埋佢哋近11場主場取得9勝2和不敗成績，對住有歐聯後顧嘅阿仙奴有力言勝。值得一提喺首循環賽事，作客嘅熱刺早段已經攻破兵工廠大門，其後因前鋒艾迪巴約領紅先大敗而回。今場熱刺返到主場，有上次對碰缺席嘅柏加同伊高圖復出，又有當弗嘅加里夫巴利，仲唔搏盡復仇？2.17倍主勝值得追捧。
頂占筍盤：熱刺（入球大）