新特蘭富咸唔識收 預咗交投疏落

猪拉多纳

歐洲幾大聯賽有個奇怪現象，英超、西甲同德甲嘅榜首球隊未到最後直路已經甩開晒，幾乎篤定捧盃，爭標形勢冇晒懸念，呢啲情況確實幾反常。不過，其餘球隊為咗歐洲賽席位同護級爭崩頭，仍然有睇頭。講番今次推介，英超賽事新特蘭主場對富咸，兩隊都係守強於攻之輩，因此呢場最好玩細。

（有線305台周六晚11時直播）

新特蘭上半季儲埋唔少分數，諗住下半季順風順水到終點，但近期佢哋表現下滑，連場輸波後已有啲護級壓力。「黑貓」實而不華，最叻係搞破壞，但要佢哋主攻爭勝絕對唔易，搏起上嚟有心無力，讓波靠唔住。富咸暫時唔使愁降班，最慘佢哋作客一樣唔多掂，入球率嚴重偏低，預計呢場都係冇乜交收，細盤賠率明顯被壓低，值得留意。
紐倫堡主場坐和望贏

同日德甲賽事紐倫堡主場對弗賴堡，弗賴堡今季表現惹人好感，但講到尾呢隊波始終唔係勁旅，家陣評級被調高，盤口冇晒着數，絕對要小心。紐倫堡近績唔突出，呢班波喺主場始終都有惡氣，極少輸波，現時莊家開緊平手盤，呢場肥叔睇好主隊坐和望贏，要紐倫堡啦！（周六晚10時30分開賽）