前田魔咒6季企硬 畀佢開齋聽降班！

猪拉多纳

要數近季日職最強土炮前鋒，肯定非磐田山葉射手前田遼一莫屬，呢名31歲前鋒已連續8季取得雙位數入波，09同10年更兩度勇奪日職神射手。不過日職流傳住一個「前田魔咒」，原來自07年起計，邊支球隊畀前田遼一取得當季首個聯賽入球，最終都係降班收場！唔想畀魔咒收死，各支球隊見到前田都真係要打醒十二分精神呀！
一手一腳踢飛腳落乙組

前田近6季開齋嘅比賽，磐田其實唔係全部贏波，不過畀佢攻破大門嗰隊冇運行。由07年起，前田每季聯賽開齋嘅對手，季尾排名都唔高過17位降班收場，其中最經典自然係上季中咒嘅老牌勁旅大阪飛腳。

飛腳上季喺第3輪遇上山葉，結果被前田開齋射入1球輸1:2，自從日職於93年成立，大阪飛腳從未試過降落乙組，點知之後愈踢愈沉，去到煞科日再遇上山葉，前田又入波贏2:1，一手一腳將飛腳踢落乙組。

睇番數據，前田喺07同08年因季初受傷，去到10輪聯賽打後先開齋，如果近4季冇病冇傷，最遲第5輪就取得士哥。最慘仲係之前5支慘中「前田魔咒」嘅球隊︰山形山神、不死鳥、東京綠茵同千葉市原目前都仲喺乙組掙扎，甲府風林亦要經過3年努力先至喺2011年重返日職，今季邊隊畀佢攻入首個入球都咪話唔驚！