乾貴士復出法蘭克福「遜」得過

猪拉多纳

今晚德甲上演獨腳戲，主場出戰嘅法蘭克福雖然近況麻麻，但有乾貴士復出重組煞食「入波鐵三角」之外，對手只係狀態低沉兼夾軍心不穩嘅慕遜加柏，肯定趁機會贏波重返正軌，簡單撐1.88倍主勝。

（有線64及204周六凌晨3:30直播）
慕遜加柏射手漢基慘被踢走

法蘭克福雖然近3場冇贏過兼冇波入，但不敵實力有明顯分野嘅多蒙特，同打和防守力僅次於拜仁嘅弗賴堡，咁嘅戰果其實絕對可以接受，再者上場坐波監嘅乾貴士，今晚復出同史堤芬艾格拿合作雙翼齊飛，配合埋進攻中場美亞後上數胡，法蘭克福有番今季最煞食嘅「入波鐵三角」，想話贏波反彈易過借火。

另邊廂，近6場3和3負、當中3場作客輸晒嘅慕遜加柏，日前宣布唔同季尾約滿嘅漢基續約，需知道呢位29歲射手係球隊10/11年球季嘅護級功臣，但自從盧克迪莊由川迪加盟，佢唔單只失去正選位，依家球會仲打完齋唔要和尚，陣中艾蘭高、托賓麥斯同史蘭斯幾件三字頭主力，睇見漢基有咁嘅下場，個心怯一怯表現隨時走樣都唔奇。