西維爾 馬體會「大」駁火

猪拉多纳

防線鬥穿窿

繼「國家打吡」巴塞惡鬥皇馬，今晚將由西維爾主場迎戰馬德里體育會，合演另一場西盃4強次回合賽事。首回合雙方各有後防重心被逐，防線陣容齊齊不整，一班進攻好手肯定趁機大鬥法，1.8倍入球大可期。

（now632台周四清晨5:00直播）
西維爾收起尼格度搏今鋪

馬體會呢排賽程雖然密麻麻，不過唔使擔心會體力不繼，事關呢班波愈打愈起勁，喺歐霸盃對魯賓卡山贏波出局後，士氣唔單只冇受影響，跟手喺西甲鬥愛斯賓奴，弗爆前鋒迪亞高哥斯達逼到對方輸咗球12碼外，防守硬淨到領咗4面黃牌，足證馬體會依然鬥志十足。再者首回合冇落場嘅法卡奧，連同阿祖安盧比斯、阿達杜倫悉數候命，遇上缺少史柏希斯同費蘭度拿華路兩名核心嘅西維爾防線，入波隨時執豆咁執。

另一邊廂，首回合作客輸1:2嘅西維爾亦唔係坐以待斃，上場聯賽專登收起首回合有波入嘅尼格度，畀佢養精蓄銳喺今場搏殺，加埋兩翼迪摩奴、捷西斯拿華斯同拿傑迪錫派牌，擺明係趁馬體會防線定海神針高甸停賽，一心想同對方大駁火，咁情況梗係撐入球大啦！

首回合：西客負1:2