小飛俠重生 拜仁席倦狂「蜂」

猪拉多纳

上季罪人回歸大報復

大家仲有印象嘅話，應該記得洛賓上季尾對多蒙特射失咗球12碼，間接令拜仁慕尼黑斷送聯賽錦標，呢位荷蘭翼鋒最近重拾「小飛俠」本色，今晚喺德國盃8強撞正勁敵多蒙特當然想一雪前恥。以拜仁近期贏到開巷嘅走勢，當然夠資格讓「蜜蜂兵團」半一，呢場上屆「德國盃決賽翻版戰」一於捧上盤。

（無綫翡翠台周四凌晨3:30直播）
贏到開巷聯賽留力一樣掂

拜仁名譽主席碧根鮑華前日向《圖片報》揚言，除非有舊隕石跌落沙賓納大街（拜仁總部所在地），否則冇嘢可以阻到佢哋第23次捧走聯賽冠軍。「凱撒大帝」咁囂士無他嘅，畢竟呢支班霸喺德甲以17分大拋離次席嘅多蒙特，基本上聯賽錦標已經成為囊中物，難怪主帥軒歷基斯咁老定，上場聯賽收起晒舒韋恩史迪加、卻奧斯、湯馬士梅拿、阿拉巴同文迪蘇傑幾位正選，集中火力應付今晚場德國盃啦！

話就話拜仁上場聯賽留力，但都照炒雲達不來梅6:1，最出位必數兩傳一射搶盡風頭嘅洛賓。呢位仁兄喺上季第30輪聯賽12碼宴客，連累拜仁輸畀多蒙特。家陣「小飛俠」歸位肯定想做番齣好戲，今晚趁列貝利停賽就更加要孭重飛啦。再講吖，軒歷基斯話過埋今季之後就可以抖吓，言下之意極可能係季尾退休，歎世界之前當然想橫掃錦標，留番個美好回憶，況且過到多蒙特呢關，都可以話係揸住半隻盃耳，又點會唔搏命吖？
多蒙特跌Watt 「羅拔仔」過檔？

去屆德國盃決賽，多蒙特憑羅拔利雲度夫斯基連中三元大勝拜仁5:2，今仗佢當然食過翻尋味。之不過多蒙特近期表現明顯跌Watt，試過輸鑊勁畀漢堡1:4，上仗缺少停賽嘅「羅拔仔」亦只能同慕遜加柏各一言和，證明多蒙特都幾倚重呢位波蘭射手。不過最微妙嘅係，「羅拔仔」一直被傳下季會過拜仁，佢經理人古查斯基尋日就向波蘭電視台暗示：「羅拔已經作出決定，佢之前從未効力同一間球會多過2年，但喺多蒙特已經踢咗3季，佢會喺適當時候宣布去向。」唔知佢今場對住班「未來隊友」會出幾成功力呢？仲有，隊長曉姆斯啱啱場波整親鼠蹊，今仗紮住上隨時成為計時炸彈，造訪近6仗喪入20球嘅拜仁真係唔樂觀。
拜仁20場不敗

‧自從上年10月底輸畀利華古遜之後，拜仁已經連續20仗不敗。

‧拜仁最近5仗都喺半場領先對手。

‧多蒙特近5戰得1場保持清白之身。
拜仁猛火熱捧入球大

拜仁火力驚人，今季聯賽已勁入63球，創紀錄成為德甲史上頭23輪聯賽最多產球隊，今仗對住爭盃勁敵多蒙特又點會腳下留情吖！之不過「蜜蜂兵團」對上6次造訪拜仁都有波入，今晚仲有「羅拔仔」復出添，雙方鋒力都唔講得小，1.62倍大係就係熱啲，但穩陣吖嘛！