史特加神經刀劈波琴

猪拉多纳

德盃頭場史特加主場鬥波琴，史特加無論實力同狀態都遠勝對手，今晚主場遇乙組弱旅唔會留手，捧1.82倍「讓球主勝」。

（周四凌晨2時開賽）

史特加計人腳值德甲中游，比起德乙下游隊伍波琴當然高一皮，而且佢哋狀態相當周期性，好嗰輪會持續一段幾長時間，佢哋近期確處佳態，喺德甲同歐霸已錄得四戰不敗，聯賽基本上已護級無憂，可以更專注盃賽，球隊上周末聯賽喺遠征歸來休息不足下僅賽和紐倫堡，教練拉巴迪亞賽後認為球員表現唔夠集中，今晚打醒精神主場遇弱旅，極有希望大勝一仗。
波琴態曳兼斷箭

波琴今季演出令人失望，聯賽仲要為護級而戰，德國盃能夠打入八強全因一路抽靚籤未遇過德甲球隊，佢哋歇冬後四戰只得一勝狀態欠佳，加上球隊首席射手、斯洛文尼亞前鋒迪迪因傷缺陣，更加欠缺爆冷本錢，今晚作客維爾廷斯球場輸兩球應該係最低消費。