國家打吡「大」駁火

猪拉多纳

首回合主場1:1 銀河艦隊焗攻巴塞

西班牙國家打吡一周兩連擊！首關為西盃4強次回合，巴塞先坐鎮主場迎戰皇家馬德里。美斯惡鬥C朗固然係焦點所在，不過佢哋班拍檔好似韋拿、基斯甸泰路、卡卡、希古恩，近期輪流發威弗到爆，何況「銀河艦隊」因首回合主場只能逼和巴塞1比1，失作客入球下想晉級就必須爭取士哥，焗攻下更有利巴塞打反擊，大駁火在所難免，就算大細中位數調至3.5球都照捧大盤。

（now 632周三凌晨4時直播）
韋拿弗番 拍美斯數胡

其實兩軍近況都只是一般，尤其巴塞上周中於歐聯16強首回合敗走米蘭，上周六聯賽幾經辛苦才反勝西維爾，加上連續11場有失波的肉酸數據，後防不穩為人詬病。好彩除咗王牌射手美斯外，西班牙前鋒韋拿亦重拾射門鞋，踏入2013年6戰入4粒之餘，喺其職業生涯曾5破皇馬門神迪亞高洛迪古斯嘅大門，難怪《世界體育報》的民調中，有97％球迷希望韋拿能夠在國家打吡披甲。

值得一提的是上仗後備入替送出助攻的翼鋒基斯甸泰路，此子個人突破能力超強，往往能成為改變戰局的一路奇兵，加埋抖夠嘅柏度洛迪古斯及傷愈復出嘅沙維，巴塞依然不愁火力不足。
失作客入球 形勢被動

皇馬方面，由於箭頭賓施馬狀態欠佳，教練莫連奴重新起用希古恩同卡卡夥拍C朗，前者剛喺完場前絕殺拉科，並收穫個人西甲第100個士哥，其門前觸覺依然敏銳，上仗替球隊扳平嘅卡卡，據統計佢之前39場有助攻或入波嘅賽事，皇馬全部贏晒，預計這位福將會續任正選，另中場指揮官沙比阿朗素亦可紮住上陣，搏完今仗先理周六嗰場聯賽對碰。

由於首回合打成1比1，皇馬失了作客入球，為殺入決賽，起碼要入到波先至有價講，今仗作客魯營冇得揀要焗攻，隨時益咗巴塞。若以中位數3.5球計，巴塞近5次喺魯營對皇馬有4次開大，呢場關乎決賽席位更加唔會保留，入球大有買趁早。