Fit爆鋒將撞正紙紮後防 熱刺掃冧錘仔幫

猪拉多纳

今晚英超獨腳戲上演倫敦打吡，韋斯咸會喺主場迎戰熱刺。呢排頹到爆嘅韋斯咸，除咗幾件箭頭齊齊啞火，仲要中埋「逢4輸2」魔咒，對住喺歐霸盃淘汰里昂殺入16強、士氣正盛嘅熱刺，睇嚟都係難逃一敗，客勝有2.05倍咁好分頭，當然值捧。

（有線200及300、廣東體育周二凌晨4:00直播）

「錘仔幫」韋斯咸呢班波真係差到冇人有，近8場贏得嗰1場都算啦，輸咗5場嘅佢哋仲要喪失17球，名副其實係紙紮防線，最慘係條前鋒線都唔好得去邊，安祖卡路爾、卡頓高爾同查馬克呢班射手近排夾埋入得1粒，就算中場祖爾奧拜恩喺今場傷愈復出，但係想憑咁弱雞嘅火力贏波？好難囉！
韋斯咸「逢4輸2」今場濕滯

況且，中咗「逢4輸2」魔咒嘅「錘仔幫」，由聯賽開咧主場擊敗阿士東維拉開始，無論贏波定係打和都好，總之主場每逢4場不敗後就例牌輸番2場，依家嚟到第三個循環，上輪主場砌低史雲斯嘅佢哋，「4場不敗」剛啱夠數，睇嚟今晚又係時候「回吐」喇。

另邊廂，啱啱喺歐霸盃搏盡嘅熱刺，大家或者擔心佢哋體力輸蝕，不過淘汰里昂躋身16強嘅佢哋，士氣高昂呢點足以彌補體力問題，雖然迪科爾要繼續養傷，但係加里夫巴利同艾朗連儂雙翼齊飛，配合埋艾迪巴約喺前線壓陣，要戳破「錘仔幫」條紙紮防線可謂易如反掌！