|
後防失魂靠前線搶分
小妹不嬲鍾意睇「寫實勵志片」,今晚英格蘭「聯賽盃好戲」上畫,小妹希望「乙組仔」巴拉福特嘅門將杜基可以完成神奇之旅,繼擊退癌魔後再搞掂史雲斯捧盃,咁就Perfect喇!
講開英聯盃決賽,其實香港兩間電視台都幾好笑,呢啲盃賽居然冇買轉播權,咁又難怪,連意甲都視若無睹,呢啲「盃仔」,佢哋又點會放在眼內?好彩小妹一早慣咗搵Link睇波,而且英聯盃同意甲嘅「連結」一般好穩定,尤其意甲豪門嘅比賽,仲例牌有高清,使驚冇得睇?哼!
錫耶納新箭有貨交
今晚大家上網捧杜基場前,不妨睇埋10點開波嘅祖雲達斯鬥錫耶納!「斑馬軍」近排陷入低潮,上仗作客羅馬仲直情輸埋添,錄得季內第4場敗仗,榜首領先優勢得番4分咁大把,後面嘅AC又買咗「腦殘」來勢洶洶,家陣已經唔到「祖記」再Hea踢聯賽,今晚係時候喪攻搶分啦!
點解話佢哋要喪攻?事關「祖記」防線近排失晒魂,近6次主場出擊有5鋪失波,最弊係守將迪斯基爾同基亞連尼仲抖緊,咁嘅環境,梗係要靠加利亞雷拉、胡仙歷同馬特尼呢個三叉戟喺前面入波搭夠啦!對家錫耶納狀態唔錯,上仗仲炒拉素3蛋,呢班波鋒力咁堅,全靠1月來投嘅瑞士前鋒恩洛辛艾馬加拉極速融入大軍,連續3戰有士哥,只要呢件新兵生性,絕對有權喺「斑馬防線」身上攞到着數,既然兩軍鋒力都咁掂,梗係捧1.54倍入球大啦!
推介:入球大
利是「成績」理想
一年一度、最High嘅「節目」終於來臨,小妹前晚專登沖乾淨涼、洗乾淨對靚手,去進行呢個神聖嘅「儀式」,咩事咁緊張?咪就係拆利是囉!今年小妹嘅「成績」非常理想,勁開心呀!今日係元宵佳節,小妹喺度祝每對情侶都恩恩愛愛、每個家庭都幸福美滿!
Sherry
曾經有個甲組球員男朋友,回復單身後寄情掟飛鏢運動,偶爾擔任兼職模特兒。近日已重墮愛河,恭喜晒! |
|