AC士氣高強爆國米

猪拉多纳

巴神打吡倒戈做好戲！

聖西路嘅球迷呢排真係大飽眼福，繼日前AC米蘭擊敗巴塞隆拿後，今晚又爆發米蘭打吡大戰，國際米蘭將會掛名主場迎戰AC米蘭。AC喺踏入2013年仲未輸過，今晚挾住歐聯贏波氣勢迎接同市打吡，肯定再開殺戒，相反國米喺上輪聯賽畀費倫天拿大炒4:1，單計士氣AC都贏成條街，3.8倍「讓球客勝」真係唔好走寶。 （中央5台周一凌晨3:45直播）

喺張峰心目中，米蘭市打吡先叫真正打吡，兩間歷史悠久嘅球會共用一個球場，加上雙方都係傳統勁旅，大戰味道濃厚，每次交手實會打甩髀。今次米蘭打吡有幾位球員倒戈，焦點一定落喺首次倒戈嘅巴洛迪利身上！佢一向言行出位，當年効力國米就公開話最愛AC，事隔幾年，今晚着起AC件波衫出席打吡戰，點會唔畀國米球迷熱情招呼呀？不過以巴神嘅心理質素，一於你有你喝倒采，佢有佢表演！
藍黑前鋒入埋唔夠後面輸

巴神狀態Fit就唔使講，夾埋另一個倒戈球員柏仙尼，同埋當紮嘅艾沙拉維，前線鋒力真係唔講得笑。講到中後場，既然能夠令美斯為首嘅巴塞鋒線冇啖好食，當然值得投以信任一票。雖然上周中應付咗一場大戰，但係AC板櫈深度夠，要連踢兩場大戰唔成問題！

國米踏入2013年踢咗11場波，只係贏咗4場咁大把，其中聯賽仲輸咗3場。雖然有迪亞高米列圖收咧，其實前線算係交足功課，近10仗場場入到波，但係「藍黑兵團」後防線就一啲都唔穩陣，可以話入幾多失幾多，今晚仲要對住一班把握力唔錯嘅AC前鋒，班後防真係有得震冇得瞓。國米上周中作客去到比利時比賽，休息時間又少一日，連會長莫拉提都同《米蘭體育報》講，今場打吡AC先係贏波大熱，張峰真係諗唔到國米有優勢嘅地方，今場除咗個「讓球客勝」之外，1.82倍入球大絕對同樣值得留意。
國米主場連開7口雙

‧國米近7場主場悉數開出入球「雙」。

‧雙方近6次對碰各贏3場。

‧AC近7場意甲入球大細單跳，上次開出「大」。