曼城未衰完 冇力拆車

猪拉多纳

文仙尼唔掂跌落谷底

英超今晚爆發「藍色生死戰」！曼城同車路士兩大豪門已經畀曼聯拋離成十分以上，兩位主帥文仙尼同賓尼迪斯嘅帥位岌岌可危，今場隨時係佢哋嘅前途生死戰。曼城依家處於今季谷底，接連失分令士氣大受打擊，相反車路士已經「衰完」，依家要為歐聯席位而戰目標鮮明，今場作客曼城有力保不敗，受讓半一下盤可捧。（有線200、204及300、廣東體育周日晚9:30直播）
藍月亮3場聯賽得2分

曼城上季雖然捧走英超冠軍，但領隊文仙尼嘅領軍能力仍備受質疑，事實上曼城今季的確出現好多失誤，歐聯分組賽出局已經令高層非常不滿。佢處理巴洛迪利嘅手法亦引嚟唔少疑問，1月賣走呢位意大利球星而冇買人頂替亦係一大敗筆，佢哋近3場聯賽只係拎到2分，爭標形勢大墮後，文仙尼責無旁貸。

作客嘅車仔都話係「同病相憐」，佢哋亦有一個連自己球迷都唔鍾意嘅領隊賓尼迪斯，不過賓帥由始至終都係掛住個「臨時」牌匾，冇人認為佢可以坐正車仔主帥一職。其實賓尼迪斯依家只係要爭取機會擦靚自己個招牌，希望下季可以搵份好工，帶領車路士入前4當然係最低要求，但目前只係領先熱刺同阿仙奴少少，絕對唔可以放鬆。
桑馬達 林伯好合拍

查實兩隊波都係以技術型中場做核心，不過相比之下車仔球員嘅狀態明顯較好，桑馬達同愈老愈可愛嘅林柏特合作無間，林伯唔經唔覺已經連續4場聯賽入波，其中3場更係同桑馬達齊齊有士哥，加埋巴西新星奧斯卡杜斯山度士嘅成熟表現，戰鬥力更勝靠大衞施華支撐嘅曼城中場，今場車仔就算作客都好大機會有分落袋。

頂占筍盤：車路士（下盤）
車仔作客表現醒

‧曼城今季主場僅1敗。

‧曼城近6場主場有5場保持清白身。

‧車路士今季聯賽作客成績暫時排第2。

‧車路士中場林柏特連續4場聯賽入波。
信往績捧埋入球大

曼城為保住些微爭冠機會，車路士要避免被同市死敵熱刺過頭，預計雙方今仗都會踢得較主動。曼城今季所有主場賽事必有波入，對手車路士就有上場唔出得嘅射手丹巴巴亞復任正選，兩軍同樣力足攻破對方大門。翻查記錄，曼城近4年主場對住車路士，當中有3場開大，信往績一於支持1.65倍入球大。