國米殘陣頂唔住AC

猪拉多纳

由1月尾至今，AC米蘭為球迷帶來嘅驚喜可謂一浪接一浪，先喺一月轉會市場購入星級人物巴洛迪利以增強實力，再來就喺歐聯砌低「地上最強」球隊巴塞隆拿。睇落AC已經全面復甦，於周一凌晨上演米蘭打吡戰，掛牌作客嘅AC爭勝機高，客W可留意。

（中央5台周一凌晨3時45分直播）

AC近期士氣如虹，特別喺歐聯16強以2比0擊敗巴塞隆拿，整個意大利都為AC勝利而瘋狂，情況就等同當年國際米蘭贏得「三冠王」一樣。自從AC去年夏天出售伊巴謙莫域及堤亞高施華之後，老闆貝魯斯干尼及高層加利安尼就一直被球迷批評轉會戰略失當。但踏入2013後就大逆轉，AC突然成為焦點球隊。由開鑼至今AC以現時氣氛最好，有助球隊喺打吡戰中爭勝。
巴洛迪利叉足電倒戈

至於人腳方面，AC並冇主力受傷，奇雲保定、艾沙拉維及蒙杜利禾全部都可正選上陣，更重要係前鋒巴洛迪利因不合歐聯出場資格，令佢可抖足精神倒戈國米。

國米剛去完羅馬尼亞踢歐霸盃，雖然順利擊敗克盧日，但比起AC少一日休息，球員體力好成疑問。最大鑊係中堅蘭奴捷亞傷埋，球隊傷停情況更為嚴重。早前已確定迪亞高米列圖重創提早收咧，穆汀加爾、祖爾奧比、森美爾、馬迪亞斯施維斯達仍處於休養期，烏拉圭國腳艾華路佩雷拉又要停賽，依家再多埋蘭奴捷亞膝傷缺陣，國米今場肯定要殘陣應敵。難怪賽前老闆莫拉堤都認低威，話AC先係今場勝波熱門。