史雲斯熱過龍撐巴拉福特

猪拉多纳

英格蘭聯賽盃決賽，英超史雲斯、英乙巴拉福特會師倫敦溫布萊球場爭標。近5屆決賽旺開下盤，卡迪夫城和到利物浦、伯明翰可勝阿仙奴，毫無大賽經驗嘅史雲斯個W只有1.28倍離晒大譜，建議買晒讓球主客和「+1」同「讓球和」，巴拉福特輸1粒都有錢收！

（廣東體育頻道周一凌晨零時直播）

聯賽盃近年成英超強隊水泡，往往去到8強甚至4強先出正選打，但對今屆決賽兩支球隊嚟講，就極其重要，簡直係大部分球員畢生最重要一戰。於史雲斯歷史上，從來未試過染指國內大盃冠軍，能否作出零的突破就睇今仗，話佢哋唔大壓力就假。睇番「黑天鵝」陣中球員，冇邊個係有盃賽決賽經驗，就算話兩年前佢哋曾於英冠附加賽決賽戰勝雷丁，但有唔少主力已經不在陣中。講開又講，該仗「黑天鵝」半場領先3粒，但換邊後都騰騰震輸番兩球，就睇到史雲斯信唔過。
近年決賽利下風波

事實上，無論你平時踢得幾叻，但去到決賽就唔同講法，球員目前背負空前壓力，加上於中立場作賽，「黑天鵝」或只得番平時七成功力。領隊米高盧特立做球員嗰陣就擸盡錦標，但做教練後只曾為邦比攞過丹麥盃，之後只曾帶領基達菲入過1次西班牙盃決賽，所以都分分鐘亂晒龍。雖然上場聯賽對利物浦，離今場決賽有八日時間，但米帥都淆晒底收起米捷、艾殊利威廉斯等數名主力，就知佢諗多咗。

再者近年聯賽盃決賽有利下風波，上屆卡迪夫城打和利物浦，前屆伯明翰擊敗阿仙奴，如果以盤路計，近5屆決賽有4場開下盤；曼聯於2010年贏阿士東維拉2比1要讓半一，上盤客只食得半格。事實上決賽大家都緊張，大戰氣氛令彼此實力差距拉近，史雲斯唔係曼聯、車路士，大賽經驗不足，今仗計盤要讓到球半，梗係唔抵買啦。
買齊「+1」同「讓球和」

巴拉福特身為「乙組仔」，入到決賽已經贏晒，今場冇乜心理壓力，將更有利發揮。呢班波今屆如有神助，接連淘汰韋根、阿仙奴同阿士東維拉，其中贏兵工廠一仗，幾乎能於法定時間內搞掂對手。而對維拉兩回合都有波入，真係唔講得笑。另外，佢哋係「12碼之王」，近9次射12碼定勝負全部贏晒，球隊心知如果能撐足120分鐘就勝算大增，目標清晰將踢得更好。預料今仗史雲斯將遇上麻煩，就算贏都係小勝，故買齊「+1」同「讓球和」，係唔錯投X選擇。