雷丁韋根困獸大廝殺

猪拉多纳

另一場英超上演榜尾廝殺好戲，尾三雷丁主場對尾二韋根，雷丁主場超勁開個平手盤有啲鬼，拿仁寧信「護級專家」韋根揀今場發力，首循環雙方共入5粒，今場1.82倍大盤抵買！

（有線303及203台周六晚11時直播）
雷丁近九戰全大

有留意雷丁嘅朋友，都知呢班波主場有料到，近六仗四勝二和轟入12球，前鋒方祖勁sharp醒頻頻入波。今仗再於福地迎戰韋根，雷丁排名仲要比對手高一級，但莊家都係開平手盤，似乎對雷丁唔係太有信心。雷丁一鼓作氣力爭護級，近期周時豁出去喪攻對手，踏入2013年連盃賽九戰全數開大，既然今仗未必贏到，當然轉敲大盤。

韋根係神奇球隊，領隊馬天尼斯好識留放，近年佢哋都留前鬥後於尾段先搶分，去季尾十一輪就勁攞23分。目前球隊排尾二只剩番十二輪，今次鬥護級對手冇理由唔發力。首循環雙方癲鳳鬥狂龍，韋根險勝3比2，今仗再追大啦！