獅吼爭衞冕狙擊噴射機

猪拉多纳

澳職常規賽仲有6輪就結束，列強都想爭入前6，趕上季後賽尾班車，其中衞冕總冠軍布里斯班獅吼依家就只係排第7，今日作客第6位嘅紐卡素噴射機，想爭取季後賽入場券幾乎係許勝不許和。足智彩開平手盤，當然撐鬥志同球員質素較佳嘅獅吼。

（有線64及204周五下午4:30直播）
噴射機雙箭頭前途不明

常規賽前6位可以躋身季後賽，目前噴射機排喺第6位，多過獅吼2分，後者如果想搶番個出線主動權，今仗自然係非勝不可。經過失望嘅季初，獅吼近期狀態逐漸回升，近5戰就取得2勝2和1負，看守教練梅利維上星期仲獲得一紙2年長約，表現得到認同。最緊要係佢哋歷來13次作客噴射機，係錄得7勝4和2負一面倒優勢，作客都冇有怕啦！

噴射機呢邊，一對英籍前鋒各有麻煩，希斯基即使表現贏得各界認同，但喺續約一事始終拖拖拉拉，呢個「大舊佬」日前公開放風話自己已經收到唔少聘約，擺明係向噴射機施壓。至於34歲嘅前列斯聯射手布歷捷斯，今季飽受傷患困擾，直到上周先係成年以來首次正選披甲，雖然話表現唔曳，但球會已經叫佢諗諗下季轉去教波，未必想同佢續約，雙箭頭都前途唔明朗，主場出擊都信唔過啦！