歐聯雙料大戰咪走寶

猪拉多纳

今晚深夜又有兩場歐聯十六強首回合，阿仙奴主場對拜仁慕尼黑同波圖主場對馬拉加會同時上演，我諗好多朋友仔今晚都會整條二串一過關，而我自己條飛就係兩場都要「大」，一於坐定定等收錢。咪以為波圖呢場戲碼弱啲，話到尾呢隊葡萄牙班霸歐洲賽經驗豐富，對手西甲嘅馬拉加狀態亦一流，計我話睇呢場係睇入球騷。
波圖馬拉加火力俱佳

波圖喺04年曾經稱霸歐洲，攞過歐聯冠軍，11年亦喺歐霸稱王，可見呢隊波一直有征服歐洲嘅野心，今季喺葡超暫時都仲係獨領群雄，攻力仲係最強添。

季初「大舊佬」侯克雖然離隊，但波圖嘅攻力就一啲都無削弱到，因為今季一對哥倫比亞「孖寶」積臣馬天尼斯同占士洛迪古斯成為入球泉源，淨係積臣馬天尼斯個人就分別喺聯賽同歐聯分組賽轟入廿球同三球，咁高產量，絕對叫得做入球機器啦！雖然占士洛迪古斯前排大腿受傷，有七場波無上陣，但係依家已經好番，可以再搏殺。加上一月中由死對頭士砵亭引入咗中場伊斯米洛夫，好快已經融入球隊，咁仲唔係如虎添翼？波圖今季主場未嘗過敗仗，喺分組賽階段三場主場賽事亦全部贏晒，所以今晚讓得多係有道理。

馬拉加近況唔錯，剛剛喺聯賽以1比0小勝畢爾包嗰場我都有投X。今季佢哋踢歐洲賽成績都不俗，由外圍賽至今都未輸過，可以話係歐聯黑馬。沙維奧拿、祖亞昆同伊斯高等等組織嘅地面波又快又有效率，今季有好成績都係同佢哋有重大關係，我敢講，呢場西葡對碰一定快打快，入球大係不二之選！