阿仙奴+1捍衞捧盃夢

猪拉多纳

拜仁征戰倫敦未W過

英超褪色勁旅阿仙奴喺歐聯十六強首回合主場惡鬥德甲班霸拜仁慕尼黑，「兵工廠」面臨八年無冠之災，今場屬挽民心關鍵之役，不容再失，雖欠正宗左閘，仍要奮力一戰。拜仁兵多將廣，但作客對英格蘭球會勝率不足兩成，而史上五征倫敦更未嘗一勝，今場讓波過火，信阿仙奴可保不敗，要「讓球主勝」！

（有線61及201台周三凌晨3時45分直播）

阿仙奴教頭雲格上場足總盃留力留出禍，主場爆冷不敵英冠布力般流浪醜死怪，佢哋喺國內盃賽出晒局，聯賽連前四都未必爭到，如想避免經歷八年錦標荒，歐聯係唯一出路。當然，現階段談論爭冠言之尚早，最實際都係打好當前呢場大戰，要贏惡爺拜仁絕對唔易，但若能喺主場贏波，起碼叫住胡先，呢點教頭雲格同隊內球員都好清楚，呢一戰關乎全季成敗，許勝不許敗。
兵工廠鐵三角有威力

「兵工廠」以前有超級射手尹佩斯勉強稱得上歐洲一線尾球隊，隨住呢位星級射手他投，家陣班波已經「降呢」，不過，前線攻擊鐵三角禾確特、基奧特同辛迪卡索拉有質有態，鋒力唔弱。阿仙奴最令人擔心始終都係後防，尤其係左閘問題，基蘭基比斯養傷，新兵蒙利爾今季代表過馬拉加打歐聯唔踢得，連安德里山度士都借走埋，今戰要搵中堅華美倫串演左閘，雲格擺明計錯數。

拜仁當然想趁阿仙奴防線大執位反客為主，佢哋今季聯賽作客十勝一和僅失一球，戰績冇得彈。不過，拜仁歐戰作客英格蘭戰績麻麻，歷來十五次造訪英格蘭球隊僅得兩勝七和六負，當中五次對住倫敦球會未贏過，千禧年至今喺歐聯作客兩鬥「兵工廠」一和一負，今次重臨倫敦「凶地」，優勢冇想像中咁大，讓波玩唔過。
數讀歐聯

0 拜仁5次作客倫敦都未贏過。

2 拜仁15次歐洲賽作客英格蘭球隊，取得2勝7和6負。

9 阿仙奴12次歐洲賽主場對德國球隊，取得9勝1和2負。

13 阿仙奴連續13屆歐聯進身16強，但自2010年後未曾打入8強。

15 拜仁分組賽6戰入15球，僅次於已出局的車路士。