漢堡勇銳追擊慕遜加柏

猪拉多纳

德甲漢堡主場鬥慕遜加柏，兩軍牌面實力接近，不過慕遜加柏啱啱搏完歐霸盃，抖唔夠48小時就要匆匆北上作客，面對狀態弗爆兼以逸待勞嘅漢堡唔夠砌，Alwin推介1.73倍主Ｗ。

（周六晚10時30分開賽）
客軍搏完歐霸未回氣

慕遜加柏教頭法夫爾一直係Alwin心儀嘅好主帥，不過今季佢都畀球隊失去多名重心骨幹考起，喺中場靈魂馬高列奧斯、中堅丹迪同防守中場紐斯泰達離隊後，至今未能搵到合適代替人選，今季高價來投嘅荷蘭中鋒盧克迪莊同西班牙守將艾華路杜明基斯演出與身價不相符，而寄予厚望嘅瑞士天才中場小將格列沙加更加連正選位置都搶唔到，雖然老將艾蘭高同小將靴爾文今季都有亮點，但水準未能每仗保持，球隊攻守實力大打折扣，球隊近況欠佳，近5場正式賽事只係喺主場險勝過弱旅杜塞爾多夫。何況佢哋啱啱喺歐霸盃同意大利拉素踢完惡戰，雖然下半場曾經人多打人少，但踢到補時4分鐘畀對手逼和3比3，首回合主場失咗3個作客入球，出線形勢極不利，可謂力疲心傷，休息唔夠48小時就要踢呢場作客硬仗，真係好難回到氣。
魯迪尼夫斯孫弘民弗爆

漢堡歇冬後表現較反覆，不過主場贏不來梅同上輪作客爆冷大炒多蒙特，真係踢到曉飛，前線拉脫維亞射手魯迪尼夫斯同大紅人南韓小將孫弘民都處於巔峰狀態，連中場靈魂雲達華治喺解決婚姻問題後亦回復佳態，今晚蓄銳追擊疲兵慕遜加柏贏面極高。考慮到漢堡今仗防線唔齊人，門將艾達、中堅文切尼因傷缺陣，另一守將謝菲布馬停賽，Alwin相信漢堡會贏但亦會失波，捧主勝之餘可以兼顧埋大盤。
Alwin 推介：

漢堡勝 ★★★★

漢堡大 ★★★

利華古遜讓球勝 ★★★