AC爭入前3唔放過帕爾馬

猪拉多纳

雖然嚟緊周中要喺歐聯16強對付巴塞隆拿，但咪以為咁就會令AC米蘭Hea踢了事。隨住意甲前列分子喺歇冬後不斷失分，令「紅黑軍團」有望爭入前3，重燃下季踢歐聯嘅希望，所以今輪主場對住帕爾馬一定唔會放軟手腳，相信可大勝一場以壯聲威，2.22倍「讓主」值撐。

（開賽時間：周六凌晨3:45）
巴洛迪利弗爆唔使留力

AC米蘭歇冬後表現神勇，喺聯賽取得4勝2和，同第3位嘅拉素縮減到得番3分距離，球員可以話信心爆棚。或者大家會擔心佢哋下周中有歐聯後顧之憂，但睇番上屆8強戰主場對「地上最強」之前，亦試過反勝羅馬，所以根本唔使驚佢哋會Hea踢。

再者，「腦殘」巴洛迪利自由英超回歸後，表現脫胎換骨，近兩場入3粒腳風超順，加上佢今屆已代表過曼城出戰歐聯，所以嚟緊已冇資格代表AC踢歐聯，可專心一意踢意甲搶分。

另邊廂嘅帕爾馬近期大跌Watt，已錄得5戰不勝。睇埋佢哋今季作客未試過保持清白身，而且首席門將米蘭迪又唔出得，令防守力進一步下降。最慘係教頭鄧納東尼上場賽後公開批評球隊表現曳，令士氣進一步下跌，相信只會衰多兩錢重。