波圖大炒冇面「比」

猪拉多纳

葡超上輪聯賽連場爆冷，波圖、賓菲加兩支勁旅齊齊失分，波圖周六凌晨作客比拉馬雖有歐聯後顧，但面對狀態、實力皆不如自己嘅弱旅，應可大勝一場吐烏氣，1.65倍「讓球客勝」可作為過關重心。

（周六凌晨4時30分開賽）
比拉馬今年未贏過

波圖上周喺聯賽主場意外地打和奧漢倫斯，好彩勁敵賓菲加同樣只能打和國民隊，令兩隊目前依然並列聯賽榜首。波圖下周中將於歐聯十六強首回合迎戰馬拉加，不過嗰場比賽佢哋有主場之利，而且翻查今季往績，每逢歐聯前嘅本土賽事佢哋都係贏多輸少，唔使擔心會出現留力情況。比拉馬現排聯賽榜尾二，只比包尾嘅摩里倫斯多一分，實力當然難同波圖相比，而且佢哋踏入二○一三年後狀態亦好差，連盃賽踢咗七場比賽未贏過，而且當中有四場比賽單場失三球，防線極度脆弱，波圖淨勝兩粒係基本消費。

另外兩關賽事，先講意甲AC米蘭主場對帕爾馬，AC同波圖一樣下周中要踢歐聯，不過加盟後頻頻有士哥嘅巴洛迪利由於不符合歐聯上陣資格，今場聯賽可以盡全力搏殺，帕爾馬作客例腳軟，捧「讓球主勝」。最後法甲里爾主場鬥雷恩，里爾上周回勇作客擊敗前列分子里昂，雷恩五場不敗之餘，平均每場都能攻入對手兩球，兩軍攻力都有保證，捧大最啱數。