拜仁攻堡吼半場「細」

猪拉多纳

留力歐聯鬥阿仙奴

德甲獨腳戲禾夫斯堡主場迎戰拜仁慕尼黑，拜仁實力大超班，不過基於喺聯賽榜已遙遙領先，老帥軒歷基斯已開始為下周中歐聯大戰部署，今晚難免會作出輪換及留力，謀定後動唔會急於搶攻，而穩健嘅防線亦足以頂得住禾堡有限鋒力，預期上半場入波唔會多，黑柴推介「半場細」。

（有線64及204台周六凌晨3時30分直播）

經過上輪聯賽幾支前列球隊多蒙特、利華古遜同法蘭克福相繼失分，拜仁喺德甲聯賽榜已拋離次席嘅多蒙特15分之多，重奪冠軍只係時間問題，基於下周三凌晨要作客倫敦，同阿仙奴角逐歐聯16強首回合賽事，嗰場波嘅勝負當然遠比今仗重要，加上陣中有丹迪、比沙路同查維馬天尼斯幾名球員有傷在身，老帥軒歷基斯已準備喺陣容方面作出輪換，保留實力同阿仙奴死過，今晚作客對禾堡當然以穩為先。

拜仁今季最大進步係防線，球隊歇冬後4場聯賽全勝保持零失球，當中有3場開出「半場細」，值得再追。
禾堡防守有進步

禾堡喺新帥赫基帶領下已逐步重返正軌，近期防線表現進步，近兩仗1勝1和只失1球，但進攻組織方面仍然有好多問題未解決，近幾場特點都係上半場整體表現較佳同較專注，今晚面對超班嘅拜仁當然唔會過分冒險，黑柴相信佢哋好難攻破拜仁穩固防線，半場亦唔會失超過一球，宜吼「半場細」。