辛尼特大展「紅」圖

猪拉多纳

增兵爭盃出計擾敵

蛇年好波播不停，今晚又有歐霸盃32強首回合激戰上演，俄超富豪球會辛尼特喺主場對英超落難班霸利物浦，讓平半博得過。為咗爭歐霸盃，辛尼特喺冬季轉會市場繼續入貨，相反紅軍救星史杜列治唔符合上陣資格肯定缺陣，領隊羅渣士又聞到魷魚香，點捧得過？

（有線61、64、201及204周五凌晨1:00直播）
般奴艾維斯坐波監冇有怕

辛尼特係08年歐協盃冠軍，今季除咗巴西射手侯克同比利時中場韋素繼續留隊，仲收購咗錫耶納嘅葡萄牙中堅路爾斯尼圖增強實力，證明依然決心大搞。就算中場拜斯杜夫同中堅般奴艾維斯今場要坐波監，相信都唔會動搖辛尼特嘅信心，事關路爾斯尼圖最近首次入選葡萄牙國家隊，絕對有能力頂替般奴艾維斯嘅空缺，大家唔需要太擔心。

另一方面，利物浦日前喺聯賽主場淨吞西布朗兩蛋後，普遍被認為爭入前4名嘅目標已玩完，法國方面仲有消息傳出，最近紅軍秘密斟介巴黎聖日耳門教頭安察洛堤，打算搵佢頂替上任未夠1年，已經宣布改革失敗嘅羅渣士領軍。同時間，辛尼特高層近日出招擾敵，放風話要高薪撬走利物浦中堅史卡迪爾，等佢唔能夠集中精神比賽，試問紅軍有咩辦法突然翻身？
利物浦史杜列治唔踢得

事實上，利物浦近4場得2和2負，之前嘅虛火已接近完全熄滅，而且新簽入嘅射手史杜列治，唔止受到傷患困擾錯過對西布朗嘅聯賽，仲因車路士歐聯出局降格踢歐霸盃，基於條例轉會後唔能夠為紅軍出戰歐霸盃賽事，當然更加靠唔住。再講，對上4次利物浦作客俄羅斯球會得2勝2負，往績普通，今場淨係靠蘇亞雷斯單打獨鬥，好難頂得住唔輸。
辛尼特歐戰主場勁

‧辛尼特以往5次對英格蘭球會得3勝2負。

‧辛尼特近19次歐洲賽主場得1場敗仗。

‧利物浦過去9次對俄羅斯球會得5勝1和3負。

‧紅軍近6場有5次至少失2球。
紅軍守勢波博辛尼特開紀錄

利物浦近排防線好似穿窿咁，對上6場有4次先失守，對住西布朗、曼城、奧咸同曼聯都係先被攻陷。由於紅軍今場有新加盟嘅射手史杜列治唔符合資格上陣，如無意外會踢番守勢波玩451，先開紀錄嘅機會進一步減少。反而辛尼特應會把握主場出戰，爭取領先迎接次回合賽事，所以辛尼特「第一隊入球」有1.81倍，真係幾抵玩。