強者高原剋「迪」

猪拉多纳

南美各國地勢差異極大，投X自由盃時，地理知識都好重要，必須特別留意高原球隊，C組玻利維亞勁旅強者就係其中之一，佢哋主場位處海拔三千六百多米，高原空氣稀薄往往搞到客軍抖唔過氣，戰鬥力大減。強者今仗主場對阿根廷球隊沙蘭迪兵工廠，主W大熱絕對有道理，值得捧場。

（周五早上8時開賽）

雖然強者近年喺自由盃只係陪跑，殺出分組賽機會唔高，但佢哋喺主場比賽，絕對唔可以睇小。事關強者所在地係海拔三千六百多米嘅玻利維亞行政首都拉巴斯，恰死唔少「平地名牌」球隊，例如上屆分組賽主場鬥兩支巴西球隊山度士及國際體育會，分別取得一勝一和，要擊敗實力一般嘅沙蘭迪兵工廠，機會甚高。
沙蘭迪兵工廠卡士曳

至於沙蘭迪兵工廠方面，千祈唔好因為佢哋來自阿根廷而高估。事實上，沙軍過往喺自由盃成績乏善可陳，上屆分組賽出局，論級數遠比唔上同國嘅小保加等傳統勁旅，去到高原比賽更難發圍。